AZƏRBAYCAN FƏLSƏFƏ VƏ SOSİAL-SİYASİ ELMLƏR ASSOSİASİYASININ

NİZAMNAMƏSİ

1. Ümumi müddəalar

1.1. Azərbaycan Fəlsəfə və Sosial-Siyasi Elmlər Assosiasiyası (bundan sonra – Assosiasiya) elm, təhsil və maarifçilik fəaliyyəti göstərən qeyri-hökumət və qeyri-siyasi təşkilatdır.

1.2. Assosiasiya öz fəaliyyətində Azərbaycan Respublikasının Konstitusiyasını, Azərbaycan Respublikasının qanunlarını, Azərbaycan Respublikasının tərəfdar çıxdığı beynəlxalq müqavilələri, Azərbaycan Respublikası Prezidentinin fərman və sərəncamlarını, Azərbaycan Respublikası Nazirlər Kabinetinin qərar və sərəncamlarını və Nizamnaməni rəhbər tutur.

1.3. Assosiasiya öz vəzifələrini yerinə yetirərkən və hüquqlarını həyata keçirərkən mərkəzi və yerli icra hakimiyyəti orqanları, dövlət müəssisələri, qeyri-hökumət təşkilatları, beynəlxalq təşkilatlar ilə qarşılıqlı əlaqədə fəaliyyət göstərir.

1.4. Assosiasiya öz ünvanı, müstəqil balansı, əmlakı, xəzinə və bank hesablarını, gerbli möhürü, künc ştampı, blankı, blankda hesablaşma hesabı olan müstəqil hüquqi şəxsdir.

1.5. Assosiasiya Azərbaycan Respublikasının Konstitusiyası, qeyri-kommersiya təşkilatları üçün mövcud qanunlar və bu nizamnamə əsasında fəaliyyət göstərir.

1.6.Təşkilatın ünvanı: Bakı şəhəri.

2. Assosiasiyanın məqsəd və vəzifələri

2.1. Assosiasiyanın əsas məqsədi elmlərin müxtəlif sahələrində Azərbaycan cəmiyyətinin tərəqqisinə yönəldilmiş fəlsəfə, ictimai tədqiqatlar və araşdırmalar aparmaq, həmin tədqiqatların vahid prioritetlərə xidmət etməsi baxımından sistemləşdirilməsi və istiqamətləndirilməsini təmin etmək, bu fəaliyyət nəticəsində qazanılmış nailiyyətləri ictimaiyyətə çatdırmaqdır.

2.2. Mövcud tarixi məqamda ölkənin daxilində və xaricində ictimai-siyasi, sosial-iqtisadi, mədəni-mənəvi inkişafın elmi təhlilini həyata keçirmək, perspektiv fəaliyyət istiqamətlərinin konsepsiya, proqram və strategiyasını hazırlamaqdır. 

2.3. İctimai elmlərlə bağlı elmi və praktik maraqları olan alimlərin, universitet müəllimlərinin, aspirantların, ekspertlərin, ictimai xadimlərin birliyini təmin edən şəbəkənin yaradılmasıdır.

2.4. İctimai elm və tədqiqat sahələri arasındakı əlaqəni asanlaşdırmaq, bu əlaqələr əsasında, onların kəsişməsində gedən tədqiqatları vahid milli və ümumbəşəri prioritetlər istiqamətində genişləndirmək.   

2.5. Assosiasiya göstərilən məqsədə nail olmaq üçün aşağıdakı vəzifələri həyata keçirir:

2.5.1.      Fərdi və kollektiv layihələr əsasında elmi araşdırmalar aparır, konfrans və seminarlar, dəyirmi masalar təşkil edir;

2.5.2.      Elmi jurnal və kitabların nəşri ilə məşğul olur;

2.5.3.      Yerli, xarici və beynəlxalq təşkilatların, elm və təhsil mərkəzlərinin, fondların imkanlarından istifadə edərək müxtəlif elm və təhsil layihələri həyata keçirir, konsaltinq proqramlar, treninqlər, təhsil və staj layihələri üzərində işləyir;

2.5.4.      Assosiasiya həm yerli, həm də xarici hüquqi və fiziki şəxslərlə, həmçinin beynəlxalq təşkilatlarla işgüzar əlaqələr yaradır, onlarla əməkdaşlıq edir;

2.5.5.      Assosiasiya konsaltinq və sosioloji tədqiqatlar, marketinq sahəsindəki xidmətlərini yerli və xarici hüquqi və fiziki şəxslərə göstərir;

2.5.6.      Assosiasiya özünün məqsəd və vəzifələrinə uyğun olaraq və qanunvericilikdə qadağan olunmayan başqa fəaliyyətləri həyata keçirir.    

3. Assosiasiyanın fəaliyyətinin təşkili

3.1.           Yığıncaq.

Assosiasiya ildə ən azı bir dəfə yığıncağını keçirir. Yığıncaqda Assosiasiyanın götürdüyü məqsəd istiqamətində gördüyü işlər haqqında informasiya verilir. Qarşıdakı vəzifələr aydınlaşdırılır. Yığıncaq müəyyən aktual mövzu ətrafında Beynəlxalq Konfransla müşayiət olunur.

3.2.           Üzvlük.

3.2.1.      Assosiasiyanın məqsədlərini bölüşən və üzvlük haqqı ödəyən istənilən şəxs Assosiasiyaya üzv ola bilər.

3.2.2.      Assosiasiyanın üzvü Assosiasiyanın rəsmi nəşrlərinin surətini almaq, Assosiasiyanın iclas və konfranslarında, tədbirlərində iştirak etmək hüququna malikdir.

3.3.           İdarə etmə

Assosiasiyanın idarəetmə orqanlarına bölmə müdirləri, İdarə Heyəti, İdarə Heyətinin sədri, Prezident və İllik Yığıncaq daxildir.

3.4.           İdarə Heyəti

İdarə Heyətinə Assosiasiyanın səsvermə hüququna malik aşağıdakı üzvləri daxildir:

3.4.1.      Assosiasiyanın nəşr etdiyi jurnalların redaktorları;

3.4.2.      Bölmə müdirləri;

3.4.3.      Proqram layihələrinin rəhbərləri;

3.4.4.      İdarə Heyətinin sədri Heyətin üzvləri arasından və Prezidentin təqdimatı əsasında seçilir.

3.5.           Prezident

Prezident Assosiasiyanı ən yüksək səviyyədə təmsil edir. O, Assosiasiyanın İllik Yığıncağında seçilir və seçilməsi müddəti İllik Yığıncağın qərarı ilə müəyyən olunur.

Prezidentin funksiyaları:

3.5.1.      Assosiasiyanın məqsədlərinə xidmət edən proqram və strategiyasını, istiqamətini təqdim etmək;

3.5.2.      Təşkilatın məsul şəxslərinin fəaliyyətini müşahidə etmək və onlara funksiyalarını yerinə yetirməkdə köməklik göstərmək;

3.5.3.      Assosiasiyanın, İdarə Heyətinin iclaslarını çağırmaq və sədrlik etmək;

3.5.4.      İdarə Heyətinin sədri ilə birlikdə İdarə Heyətinin iclasının gündəliyini hazırlamaq;

3.5.5.      Assosiasiyanın vəsaitlərinin xərclənməsinə nəzarət etmək və büdcənin inkişafı istiqamətində fəaliyyət göstərmək;

3.5.6.      Jurnalların nəşrində ideya istiqamətinin müəyyən edilməsi.  

3.6.           İdarə Heyətinin sədri və İcraçı Ofis

3.6.1        İdarə Heyətinin sədri eyni zamanda icraçı direktor funksiyasını daşıyır və Assosiasiyanın əsas administrativ şəxsidir. O, Prezidentin təqdimatı ilə İdarə Heyəti tərəfindən seçilir və Assosiasiyanın təsisçiləri tərəfindən təsdiqlənir.

3.6.2        İcraçı Ofis İdarə Heyətinin sədri (icraçı direktor) və onun işçi personalından ibarətdir. İşçi personalı İdarə Heyətinin təklifi və təsisçilərin icazəsi ilə ödənişli əsaslarla təyin olunur.

3.6.3        İdarə Heyətinin sədri aşağıdakı funksiyaları yerinə yetirir:

3.6.3.1        Assosiasiyanın əsas məqsədlərinə xidmət edən siyasət və proqramları təklif edir;

3.6.3.2        Prezidentlə birlikdə Assosiasiyanın hədəflərini, istiqamətini, İllik Yığıncağın gündəliyini təqdim edir;

3.6.3.3        İcraçı Ofisi idarə edir;

3.6.3.4        Assosiasiyanın cari fəaliyyətinə rəhbərlik edir.

3.6.3.5        Assosiasiyanın orqanlarının nəşrinə, redaksiya şurası üzvlərinin seçilməsi və fəaliyyətinə nəzarət edir.

3.6.3.6        Assosiasiyanın elan etdiyi müsabiqələrin təşkilinə nəzarət edir. Təşkilati məsələlər İcraçı Ofis tərəfindən həyata keçirilir.

3.7     Assosiasiyanın fəaliyyətinin dayandırılması

 Assosiasiyanın fəaliyyəti aşağıdakı hallarda dayandırılır:

3.7.1        Təsisçilərin birgə qərarı ilə.

3.7.2        Ümumi yığıncağın qərarı ilə.